2025 жылдың 5 ақпанында жалпы білім беретін пәндер апталығының аясында колледждің 1 курс студенттері арасында «Жасанды интеллект адамзатқа қауіп пе, әлде көмек пе?» тақырыбында пікірсайыс өтті. Сайыстың мақсаты: білім алушылардың аналитикалық ойлау қабілетін дамыту, коммуникациялық дағдыларды жетілдіру, жасанды интеллект саласындағы жаңалықтар мен технологияларға қызығушылықты ынталандыру. Пікірсайысқа 2 команда қатысты: «Жақтаушы» тобын 16 ТА тобынан Сарсенбинова Сарвиназ, Нұрғалиев Бекзат және Төлеубай Дайыр құраса, «Даттаушы» тобын 14 ТГ тобынан Келешек Дінислам, Букенова Балжан және Әрін Әділ ұсынды. Пікірсайыс 4 кезеңнен тұрды: «Шешімін тап», «Аргументация», «Сұрақ-жауап», «Өз ойым». «Шешімін тап» кезеңінде студенттер жасанды интеллектіге қатысты сұрақтарға жауап берсе, «Аргументация» кезеңінде «Жақтаушы» және «Даттаушы» топтар өз позицияларын дәлелдеу үшін аргументтер мен фактілер келтірді. Бұл кезеңде әр команда өз позициясын нығайтуға тырысты. «Сұрақ-жауап» кезеңінде командалар бір-біріне сұрақтар қойып, қарсы тараптың аргументтерін сынады. Бұл кезеңде сұрақтар мен жауаптар арқылы пікірталас тереңдеді. «Өз ойым» кезеңінде командалар жасанды интеллектінің пайдасы мен зияны туралы пікірлерін қорытындылап, негізгі аргументтерге тоқталып, ойларын түйіндеді. Сайыс қорытындысы бойынша «Даттаушы» тобы 1 орын, «Жақтаушы» тобы 2 орынды иеленді. 14 ТГ тобының студенті Келешек Дінислам «Ең жақсы зеттеу» номинациясымен, 14 ТГ тобының студенті Әрін Әділ «Сұрақ қою шеберлігі» номинациясымен, 16 ТА тобының студенті Нұрғалиев Бекзат «Ең креативті идея» номинациясымен марапатталды. Пікірсайыс өте қызықты әрі тартымды өтті. Студенттер белсенді қатысып, өз пікірлерін еркін білдірді. Сайыс барысында жасанды интеллектінің адамзат өміріндегі рөлі, оның артықшылықтары мен кемшіліктері туралы көптеген маңызды мәселелер қозғалды. Оқушылардың талқылауы мен пікір алмасуы олардың сыни ойлау қабілеттерін дамытуға ықпал етті. Пікірсайыс жоғары деңгейде өтті және қатысушылардың барлығы өз білімдерін, дағдыларын және көзқарастарын кеңейту мүмкіндігіне ие болды.